BREXITaren ondorioak

Ondasun emateak

Erresuma Batua Europar Batasunetik irteteak berekin ekarriko du, besteak beste, BEZa aplikatzen den lurraldeen eta Erresuma Batuaren arteko salgai fluxuak ez direla gehiago Batasunaren barruko eragiketak izango eta aduana formalitateak aplikatuko zaizkiela.

Horregatik, Erresuma Batuko salgaiak sartzen direnean BEZa aplikatzen den lurraldean (Penintsula eta Balear Uharteak), BEZa likidatuko da aduanan inportazioa gertatzen denean, honako kasu honetan izan ezik: enpresak hautatzen badu BEZaren ordainketa geroratzea, BEZaren Arautegiak 74. artikuluan ezartzen duen bezala (arautegi hori apirilaren 27ko 124/1993 Foru Dekretuak onartu zuen).

Inportazioan, BEZaren zerga oinarria aduanako balioa da; horri honako kontzeptu hauek gehitu behar zaizkio, bertan sartuta ez badaude:

• Inportazioa dela eta sortzen diren zergak, eskubideak, ordainarazpenak eta gainerako kargak, BEZa ez beste guztiak.

• Gastu osagarriak, hala nola, Batasunaren barruan lehenengo jomugara iritsi arte gertatzen diren komisioak eta enbalaketa, garraio eta aseguru gastuak.

BEZa aplikatzen den lurraldetik (Penintsula eta Balear Uharteak) Erresuma Batura salgaiak garraiatzea esportazioa izango da; honelako eragiketak BEZaren kargatik salbuetsita egongo dira.

Arabako enpresari batek ondasunen bat ematen badio Erresuma Batuko herritar bati, ez da aplikatuko urruneko salmenten araubidea.

Erresuma Batutik 27 estatu kideetako batera 2021eko urtarrilaren 1a baino lehen garraiatzen hasten diren eta data horren ondoren iristen diren merkantzien mugimenduei dagokienez, Aduanan aurkeztu beharko dira, baina ez dute zerga inportazio gisa ordainduko, erkidego barruko erosketa gisa baizik. Beraz, eragiketa horiek erkidego barruko eragiketen laburpen aitorpenean sartu beharko dira (349 eredua).

 

Ipar Irlandarekin egindako merkantzia trukeek estatu kide batekin Irlanda - Ipar Irlanda protokoloaren arabera egindakoen tratamendu bera izango dute. Tratamendu hori ez da zerbitzuetara hedatzen.

 

Zerbitzugintzak

BEZaren Arauko 69. eta 70. artikuluetan ezartzen diren kokapenari buruzko erregelak aplikatuko dira, kontuan hartuta Erresuma Batua Europar Batasunetik irten dela, bai eta, bereziki, BEZaren Arauko 70.Bi artikuluan zerbitzuak kokatzeko ezartzen den erregela ere: artikulu horretan azaltzen diren zerbitzuak Erresuma Batuan egin arren, BEZaren kargapean egongo dira erabilpena edo ustiapena zerga aplikatzen den lurraldean gertatuz gero.

 

IFZ-BEZa eta 349 eredua

BEZa aplikatzen den lurraldearen eta Erresuma Batuaren artean egiten diren eragiketak aurrerantzean ez direnez Batasunaren barrukoak izango, ez da haien berri eman beharko 349 ereduko laburpen aitorpenean.

Erresuma Batuarekin eragiketak egiten dituzten Arabako enpresek ere ez dute edukiko zertan identifikatu IFZ-BEZaren bidez.

Aduana eragiketarik eginez gero (inportazioak zein esportazioak), EORI zenbakia eduki behar da.

 

Telekomunikazio, irrati eta telebista zerbitzuen eta baliabide elektronikoen bidez egiten diren zerbitzuen araubide berezia (MOSS)

Erresuma Batuko enpresek Mini One-Stop Shop (MOSS) araubidea aplikatzen badute Europar Batasunean bizi diren pertsonei telekomunikazio, irrati eta telebista zerbitzuak edo baliabide elektronikoen bidezko zerbitzuak emateko, beren MOSS identifikazioa aldatu beharko dute eta Batasuneko estatu batean erregistratu beharko dute egoitza Batasunean ez dutenen araubidean.

Berezitasun hauek hartu behar dira aintzat:

1. Ateratze Akordioak bermatzen du Erresuma Batua EBtik atera aurretik hasitako merkantzia mugimenduak amaitzen direla, joan-etorria hasteko unean indarrean zeuden Batasunaren arauen arabera.

2. Ateratze Akordioak Ipar Irlandarako protokolo bat jasotzen du, eta, BEZaren ondorioetarako, EBren parte izaten jarraituko du ondasun emateei dagokienez. Horretarako, Erresuma Batuak berariazko BEZaren arau bat sortuko du, XI. aurrizkiarekin, protokolo horri atxiki dakizkiokeen enpresentzat.

Horren ondorioz, 349 ereduan sartzeko ondorioetarako, honako arau hauek aplikatuko dira Erresuma Batuarekin eta Ipar Irlandarekin egindako eragiketei dagokienez:

1. 2021eko 1 hilabete eta 1 hiruhileko aldietarako, 349 ereduak GB eta XI aurrizkiak onartuko ditu, "S" edo "I" eragiketa gakoetarako izan ezik, horiek ez baitute aurrizki horietako bat bera ere onartuko.

2. 2021eko 2 hilabetetik 12 hilabetera eta 2 hiruhilekotik 4 hiruhilekora bitarteko aldietarako, XI aurrizkia baino ez da onartuko, "S" edo "I" eragiketa gakoetarako izan ezik.

3. 2021a baino lehenagoko eragiketen zuzenketetarako, GB aurrizkia baino ez da onartuko.

4. 2021eko 1 hilabete edo 1 hiruhileko eragiketen zuzenketetarako, GB eta XI aurrizkiak onartuko dira, "S" edo "I" eragiketa gakoetarako izan ezik, horiek ez baitute aurrizki horietako bat bera ere onartuko.

5. 2021eko 2 hilabetetik 12 hilabetera eta 2 hiruhilekotik 4 hiruhilekora bitarteko eragiketen zuzenketetarako, XI aurrizkia bakarrik onartuko da, "S" edo "I" eragiketa gakoetarako izan ezik.

Batasuneko 27 estatuetako batean identifikatuta dauden enpresariek 2021eko lehen hiruhilekoko BEZ MOSS aitorpenetan sartu beharko dituzte trantsizioaldia amaitu arte (2020ko abenduaren 31) Erresuma Batuan egindako zerbitzuak, nahiz eta aitorpenak geroago aurkeztu beharra eduki.

Zerga berezien kargapeko produktuak Erresuma Batutik Europar Batasunaren zerga bereziak aplikatzen diren lurraldean sartzea zerga berezien kargapeko produktuen inportazioa izango da eta halako produktuak zergen aplikazio lurraldetik Erresuma Batura bidaltzea edo garraiatzea esportazioa, Kontseiluaren 2008ko abenduaren 16ko 2008/118/EE Gidalerroarekin bat etorriz (zerga berezien araubide orokorrari buruzko gidalerroa).

Zerga Berezien Zirkulaziorako eta Kontrolerako Sistema Informatizatua (EMCS) ez zaie gehiago aplikatuko zerga berezien kargapean dauden produktuak etendura araubidean Batasunetik Erresuma Batura bidaltzen direnean; mugimendu horiek esportaziotzat joko dira. Beraz, halako mugimendurik eginez gero, esportazio aitorpena egin behar da eta administrazio agiri elektronikoa (e-AD) aurkeztu behar da. Zerga berezien kargapean dauden produktuak Erresuma Batutik Europar Batasunera bidaltzen direnean, EMCS sistemaren esparruan mugimendua hasi aurretik aduanako formalitateak bete beharko dira.

 

Arabako Lurralde Historikoan zerga hau 37/2013 Foru Arauak, abenduaren 13koak, sozietateen gaineko zergarenak arautzen du.

Zergak sozietateen eta gainerako erakunde juridikoen errenta zergapetzen du (SZFAren 1. artikulua).

Zergaren zergadunak dira SZFAren 11. artikuluan araututako erakundeak.

Nabarmendu behar da bi aldeko hitzarmena dagoela Erresuma Batuaren eta Espainiaren artean ezarpen bikoitza saihesteko. Hitzarmen hori aplikatzen jarraitu ahalko da. Hori dela eta, barne araudia aplikatzearen ondorioz salbuetsita egoteari uzten dioten zenbait errenta, salbuetsitako errentak izango lirateke, hitzarmena aplikatzeko eskubideari lotuz gero.

 

Gizarte aurreikuspeneko sistemetara egindako ekarpenak (SZFAren 27. artikulua)

SZFAren 27. artikuluak, gizarte aurreikuspeneko sistemetara egindako ekarpenak arautzen dituenak, langileen ordainsarien gastuak zein kasutan izango diren kengarriak ezartzen du, plan eta pentsio funtsetara egindako ekarpenen, borondatezko gizarte aurreikuspeneko erakundeen gizarte aurreikuspeneko planetarako egindako ekarpenen eta enpresen gizarte aurreikuspeneko planetara egindako ekarpenen bidez. Hori horrela, kengarritzat hartzen dira 2003/41/EE zuzentarauan ezarritako enpresa sustatzaileek beste estatu kide batean baimendu edo erregistratutako enpleguko pentsio funtsetara egindako ekarpenak, betiere zenbait baldintzak betetzen badira.

2021eko urtarrilaren 1etik aurrera kontuan hartu beharko da Erresuma Batuko enpleguko pentsio funtsetara egindako ekarpenak ez direla gastu kengarritzat hartuko.

 

Egoitza aldatzea eta ondare elementuak lekualdatzea atzerrian dauden establezimendu iraunkorretara (SZFAren 41. artikulua)

SZFAren 41. artikuluak ondare elementuak atzerrian kokatuta dauden establezimendu iraunkorretara eramatearen ondorioak arautzen ditu, bai Europar Batasuneko edo Europako Esparru Ekonomikoko beste estatu kide batera, bai  hirugarren herrialde batera egiten bada tokialdaketa.

2021eko urtarrilaren 1etik aurrera, ondare elementuak Erresuma batuan kokatuta dauden establezimendu iraunkorretara eramateak zerga zor bat sortuko du ’ozietateen gaineko zergan, eta ezingo da inola ere zatikatu.

Halaber, Erresuma Batutik Espainiako lurraldera egiten bada bizileku aldaketa, edo ondare elementuak edo jarduerak Espainiako lurraldera eramaten badira, Erresuma Batuan irteteagatiko ezarpen bat jasotzen badute, ez da aplikatuko SZFAren 41. artikuluko 4. atala. Horren arabera, irteteagatiko ezarpen hori Europar Batasuneko estatu kide batean gertatzen bada, Europar Batasuneko estatu kide horren balioa zerga baliotzat hartuko da Espainian, merkatu balioa ez badu jasotzen salbu.

 

 

Lotutako pertsona edo erakundeen arteko eragiketen tratamendua: dokumentazio betebeharrak (SZFAren 43. artikulua)

Karga arintzea, SZFAren 43. artikuluko 10. atalean ezarritakoa, herrialdeen arteko informazioa ematearena, zenbait inguruabar gertatzen direnean, informazio hau eman behar dute Espainiako lurraldean egoiliar diren entitateek Espainiako lurraldean ez-egoiliar diren beste entitate baten menpekoak badira, zuzenean edo zeharka, eta ez-egoiliarra den entitate hori ez bada beste entitate baten menpekoa, bai eta taldeko entitate ez-egoiliarren Espainiako lurraldeko establezimendu iraunkorrek ere, eta betiere inguruabar hauetakoren bat gertatzen bada:

• Talde multinazionalak, Erresuma Batuan bizi den taldearen mendeko erakunde bat izendatu badu aipatutako informazioa aurkezteko.
• Informazioa dagoeneko Erresuma Batuan aurkeztu izana han bizi den erakunde batek, taldeak erakunde nagusiaren subrogatu gisa izendatutakoa, aurkezpen horren ondorioetarako, kontseiluak 2011ko otsailaren 15ean ezarritako 2011/16/EB Zuzentarauaren III. Eranskineko II. sekzioko 2. atalean ezarritako baldintzak ez baditu betetzen, fiskaltzaren arloko administrazio lankidetzari buruzkoa dena.

 

Entitate ez-egoiliarrek eta atzerrian dagoen establezimendu iraunkorrek lortutako errenta positibo jakin batzuk zerga oinarrian sartzea (SZFAren 48. artikulua)

SZFAren 48. artikuluak ezartzen du egoitza bertan ez duten erakundeek eta atzerrian kokatuta dauden establezimendu iraunkorrek lortutako errenta positiboen ezarpena, zenbait inguruabar gertatzen badira, hala nola Estatuan kokatuta ez dauden erakundeetan elkarri lotutako bazkideek % 50 baino handiagoa den partaidetza badute, eta zuzeneko zerga karga, zerga honen arauen arabera dagokion zenbatekoaren eta egoiliarra ez den erakundeak benetan ordaindu duenaren zenbatekoaren arteko aldea baino txikiagoa den zuzeneko zerga karga badute.

Zergadunak ezarpen araubide hori saihestu ahalko du partaidetutako entitatearen egoitza edo establezimendu iraunkorra Europar Batasuneko edo Europako Esparru Ekonomikoko beste estatu batean badago, eta paradisu fiskaltzat hartzen den herrialde edo lurralde batean, edo tributaziorik ez duen herrialde edo lurralde batean ez badago kokatuta, betiere partaidetza duen erakundeak bere bizilekua Estatuan ezarri duela frogatzen badu, eta egitura, sozietateen gaineko zergarengatiko tributazioa murrizteko helburua izanda, artifizial huts ez bada.

Halaber, ezarpen araubide hori ez da aplikatuko Espainiako lurraldean kokatuta ez dagoen erakundea edo establezimendu iraunkorra, Europar Batasuneko beste estatu kide batean badago, edo Europako Esparru Ekonomikoaren akordioan barne hartzen bada, betiere Europako Parlamentuaren eta Kontseiluaren 2009ko uztailaren 13ko 2009/65/EE Zuzentarauak (higigarrien baloreetako talde inbertsioko entitate batzuei buruzko lege, arau eta administrazio xedapenak koordinatzen dituenak) arautzen dituen talde inbertsioko entitateetakoa bada, foru arau honek 81. artikuluan arautzen dituenak ez beste bat, eta Europar Batasuneko estatu batean eratuta eta egoiliartuta badago.

Kontrolatutako erakundea beste estatu kide batean kokatuta badago edo Europako Esparru Ekonomikoko akordioan barne hartzen bada, nazioarteko gardentasun fiskaleko araubidea aplikatzetik salbuesteko klausula hauek ez dira aplikatuko Erresuma Batuan 2021eko urtarrilaren 1etik aurrera.

Horrenbestez, 2021eko urtarrilaren 1etik aurrera, aplikatuko da nazioarteko gardentasun fiskaleko araubidea, eta lurralde britainiarrean helbideratuta dagoen erakundeak lortzen dituen errentek ezarpen araubidearen mende egongo dira, Espainiako bazkidearen egoitzan.

 

Ikerketa eta garapen jarduerengatiko kenkaria (SZFAren 62 artikulua)

SZFAren 62. artikuluak kenkari bat ezartzen du kuota likidoan ikerketa eta garapen jarduerak egiteagatik. Hori kalkulatzeko, ikerketa eta garapen gastuen zenbatekoa kontuan hartu beharko da, eta hala badagokio, ibilgetu material eta ukiezineko elementuetan egindako inbertsioena, higiezinak eta lursailak kanpoan utzita.

Artikulu horrek honako hau gaineratzen du:

• Europar Batasuneko edo Europako Esparru Ekonomikoko beste estatu batzuetan egindako jarduerei dagozkien ikerketa eta garapen gastuak ere kenkariaren oinarriaren zati izan daitezke.
• Europar Batasunekoak edo Europako Esparru Ekonomikokoak ez diren estatuetan egindako jardueren gastuei dagokienez, hauek ere kenkarirako eskubidea izango dute, baldin eta ikerketa eta garapeneko jarduera nagusia Europar Batasuneko edo Europako Esparru Ekonomikoko estatu batean egiten bada eta gastuen zenbatekoa guztirako inbertsioaren ehuneko 25 baino gehiago ez bada.
• Ikerketa eta garapeneko gastutzat hartuko dira, era berean, jarduera horiek Europar Batasuneko edo Europako Esparru Ekonomikoko estaturen batean egiteko asmoz zergadunak berak edo beste entitate batzuekin batera eskatuta ordaintzen diren kopuruak.

Horrenbestez, 2021eko urtarrilaren 1etik aurrera, Espainiako erakunde zergadunek sozietateen gaineko zergarengatik eta Erresuma Batuan egindako ikerketa eta garapen jardueren ondorioz bere gain hartutako kostuak ez dira kontuan hartuko mota horretan jarduerak egiteagatiko kenkariaren oinarria kalkulatzeko, ikerketa eta garapen jarduera nagusia Europar Batasuneko edo Europako Esparru Ekonomikoko estatu batean egiten bada, eta Erresuma Batuan edo Europar Batasunekoak edo Europako Esparru Ekonomikokoak ez diren beste estatuetan egindako jardueren gastuak inbertitutako zenbatekoaren % 25 baino handiagoak ez badira.

 

Berrikuntza teknologikoko jarduerengatiko kenkaria (SZFAren 63 artikulua)

SZFAren 63. artikuluak kenkari bat ezartzen du kuota likidoan berrikuntza teknologikoko jarduerak egiteagatik, aipatutako artikuluaren 3. atalean ezarritako kontzeptuei dagozkie.

Artikulu horrek honako hau gaineratzen du:

• Europar Batasuneko edo Europako Esparru Ekonomikoko beste estatu batzuetan egindako jarduerei dagozkien teknologia berrikuntzako gastuak ere kenkariaren oinarriaren parte izan daitezke.
• Europar Batasunekoak edo Europako Esparru Ekonomikokoak ez diren estatuetan egindako jardueren gastuei dagokienez, hauek ere kenkarirako eskubidea izango dute, baldin eta berrikuntza teknologikorako jarduera nagusia Europar Batasuneko edo Europako Esparru Ekonomikoko estatu batean egiten bada eta gastuen zenbatekoa guztirako inbertsioaren ehuneko 25 baino gehiago ez bada.
• Berrikuntza teknologikoko gastutzat hartuko dira, era berean, jarduera horiek Europar Batasuneko edo Europako Esparru Ekonomikoko estaturen batean egiteko asmoz, zergadunak berak edo beste entitate batzuekin batera eskatuta, ordaintzen diren kopuruak

Horrenbestez, 2021eko urtarrilaren 1etik aurrera, Espainiako erakunde zergadunek sozietateen gaineko zergarengatik eta Erresuma Batuan egindako ikerketa eta garapen jardueren ondorioz bere gain hartutako kostuak ez dira kontuan hartuko mota horretan jarduerak egiteagatiko kenkariaren oinarria kalkulatzeko, ikerketa eta garapen jarduera nagusia Europar Batasuneko edo Europako Esparru Ekonomikoko estatu batean egiten bada, eta Erresuma Batuan edo Europar Batasunekoak edo Europako Esparru Ekonomikokoak ez diren beste estatuetan egindako jardueren gastuak inbertitutako zenbatekoaren % 25 baino handiagoak ez badira.

 

Interes ekonomikoko Europako taldeak (SZFAren 74. artikulua)

SZFAren 74. artikuluak, uztailaren 25eko 2137/1985 araudiak (EEE), Europako Erkidegoetako Kontseiluarenak, araututako interes ekonomikoko Europako taldeei aplikatzen zaien araubide fiskal berezia arautzen du. Hor ezartzen da interes ekonomikoko Europako talde bateko kideak bakarrik izan daitezkeela sozietateak, eta estatu kide baten legediari jarraituz eratutako eskubide publiko edo pribatuko beste erakunde batzuk, estatutu edo legezko egoitza eta administrazio nagusia erkidegoan badute.

Halaber, Estatu kide baten legediarekin bat, sozietate batek edo beste erakunde juridiko batek, estatutu edo legezko egoitza bat ez badute behar, interes ekonomikoko Europako taldetzat hartzeko nahikoa izango da sozietate edo erakunde juridiko horrek bere administrazio nagusia erkidegoan izatea.

Interes ekonomikoko Europako talde bateko kideak ere izan daitezke industria, merkataritza, artisau, nekazaritza jarduera bat egiten duten, lanbide liberala duten edo Erkidegoan bestelako zerbitzuak egiten dituzten pertsona fisikoak.

Horrenbestez, 2021eko urtarrilaren 1etik aurrera, mota horretako joint venture-ak, espainiar eta britainiar erakundeek osatutakoak, ezingo dira hartu interes ekonomikoko Europako taldetzat. Beraz, ezingo zaie bazkideei aplikatu SZFAren 74. artikuluan ezarritako errentak egozteko zerga araubide berezia.

 

Inbertsio kolektiboko erakundeen bazkide edo partaideen tributazioa (SZFAren 79. artikulua)

SZFAren 79. artikuluak inbertsio kolektiboko erakundeetako bazkide edo partaideen tributazioa arautzen du, eta 3. atalean ezartzen da Europar Batasuneko estatu kideren batean eratutako edo helbideratutako, eta CNMVren erregistro berezi batean inskribatutako inbertsio kolektiboko erakundeen bazkide edo partaideen tributazioa, partaidetzak eskualdatzen direnean edo dibidenduan banatzen direnean gertatuko dela.

Hortik ondorioztatzen da errenta horietan ez dela aplikatuko errentak egozteko araubidea.

2021eko urtarrilaren 1etik aurrera, Erresuma Batuan eratutako, eta komertzializatzeko CNMVn inskribatutako SZFAren 79.3. artikulua inbertsio kolektiboko erakundeei ez aplikatzeak, kasu bakoitza aztertzea ekarriko du, errenta horien tributazioa ezartzeko.

 

Bat-egiteen, zatiketen, aktiboen ekarpenen, balore trukeen eta Europako sozietate baten edo Estatu kide bateko Europako sozietate kooperatibo batetik Europar Batasuneko beste Estatu kide baterako helbide sozialaren aldaketaren araubide berezia (SZFAren 101-114. artikuluak)

Araubide hori SZFAren 101-114. artikuluetan araututa dago, eta enpresen berregituraketa eragiketei egiten die erreferentzia. Eragiketa horiek egitearen ondorioz eskualdatutako ondare elementuetan dauden errenten tributazioa geroratzea ekartzen du.

2021eko urtarrilaren 1etik aurrera, ez da aplikatuko enpresa berregituratzeetarako neutraltasun araubidea sozietate europarrek eta kooperatiba sozietate europarrek beren egoitza Erresuma Batutik Espainiara (eta alderantziz) aldatzean, ez eta zerga araubidea honako baldintza honen pean dagoen eragiketa guztietan ere (bat-egiteak, zatiketak, balore trukeak eta aktibo ekarpenak): entitate eskuratzailea edo nagusia, haren bazkideak edo eskualdatutako elementua Europar Batasuneko estatu bateko egoiliarra izatea edo hartan kokaturik egotea.

 

Konturako ordainketak (SZFAren 130. artikulua)

SZFAren 130. artikuluaren 1. ataleko hirugarren paragrafoak hauxe ezartzen du:

“Halaber, Espainian zerbitzuak libre emateko araubidean diharduten Europako Esparru Ekonomikoko beste estatu kide batean helbideratutako aseguru entitateak behartuta daude atxikipena eta konturako sarrera egitera, Espainian egiten diren eragiketei dagokienez”.

Horrenbestez, Europako Esparru Ekonomikoko beste estatu kide batean helbideratutako aseguru erakundeek, zerbitzuak libre emateko araubidean jarduten badute, atxikipena egin beharko dute Espainian egiten diren eragiketetan.

2021eko urtarrilaren 1etik aurrera, erakunde britainiarretan ez da gertatuko kontzeptu horrengatik atxikitzera behartuta dagoen subjektu izaeraren egitate garrantzitsuaren kasua. Hala ere, atxiki beharko dute Espainian etengabe jarduten badute.

 

Kultura sustatzeko pizgarriak (SZFAren hamabosgarren xedapen gehigarria)

SZFAren hamabosgarren xedapen gehigarriaren lehen eta bigarren atalek film luze eta ikus-entzunezko sailen Espainiako ekoizpen lanetan, eta film luze eta ikus-entzunezko lanen atzerriko ekoizpenetan egindako inbertsioengatiko kenkari batzuk arautzen dituzte.  Laugarren atalean kenkari hauen ehunekoei ezarritako muga batzuk jasotzen dira. Kenkari honen zenbatekoaren eta zergadunak jasotako gainerako laguntzen batura ezin da izan ekoizpen kostuaren % 50 baino gehiago. Hala ere, muga hori % 60ra igoko da Europar Batasuneko Estatu kide batek baino gehiagok finantzatutako mugaz haraindiko ekoizpen lanetan, Estatu kide bat baino gehiagoko ekoizleek parte hartzen badute. Horrela, Erresuma Batua Europar Batasunatik irteten bada, ekoiztetxe britainiarrek parte hartzen duten koprodukzio lanek ez diote etekinik aterako gehitutako mugari.

Halaber, hori horrela, abenduaren 28ko 55/2007 Legearen 5. artikuluak, zinemari buruzkoak (abenduaren 29ko BOE), ekoizpen lan bat espainiartzat hartzeko baldintzak jasotzen ditu. Horrela, egile, aktore edo zinema eta ikus-entzunezko lanen teknikari sortzaileen % 75 gutxienez espainolak edo Europar Batasuneko beste edozein Estatu kidetakoak, Europako Esparru Ekonomikokoak izatea, Espainiako edo Estatu kide horien edozeinetako indarreko bizileku baimena edo txartela edukitzea eskatzen da.

2021eko urtarrilaren 1etik aurrera, nazionalitate edo bizileku britainiarra duten egile, aktore edo teknikariak ez dira kontuan hartuko aurretik adierazitako ehunekoa aplikatzeko.

SZFAren hamabosgarren xedapen gehigarriko bigarren atalean, atzerriko ekoizpen lan egiten duten ekoizleek, kuota likidoaren % 25eko kenkaria izateko eskubidea dutela ezartzen da, Autonomia Erkidegoko lurraldean egindako gastuetan, betiere zenbait mugarekin. Gastu horiek, besteak beste sortzaileenak dira, helbide fiskala Espainian edo Europako Esparru Ekonomikoko Estatu kideren batean badute, muga honekin.

2021eko urtarrilaren 1etik aurrera, bizileku fiskala Erresuma Batuan duten langile sortzaileek ez dute izango kenkaria izateko eskubidea Espainiako erakunde ekoizle batek han egindako gastuengatik.

Azaroaren 27ko 33/2013 Foru Arauak, pertsona fisikoen errentaren gaineko zergari buruzkoak, eta 40/2014 Foru Dekretuak, zergaren araudia onartzen duen abuztuaren 1eko Diputatuen Kontseiluarenak, arautzen dute zerga hori Arabako Lurralde Historikoan.

Errentaren eta ondarearen gaineko zergen arloan, Espainiako Erresumaren eta Britainia Handiko Erresuma Batuaren eta Ipar Irlandaren arteko hitzarmenaren egoera bakoitzari dagokion aplikazioa eta haren protokoloa (Londresen, 2013ko martxoaren 14an (2014ko maiatzaren 15eko BOE) egindakoa), CDI aurrerantzean, gorabehera. 

 

Egoitza aldatzen bada, egozteko geratzen diren errentak eta irabaziak

Azaroaren 27ko 33/2013 Foru Arauaren, pertsona fisikoen errentaren gaineko zergarenaren, 57.3. artikuluak hauxe ezartzen du:  Zergadunak bizilekua beste estatu batera aldatzen badu, egozteko geratzen diren errenta guztiak PFEZengatik aitortu behar duen azken zergaldiaren zerga oinarrian sartu beharko dira.

Europar Batasuneko herrialde batera joaten bada, zergadunak aukera dezake, egozteko geratzen diren errenta bakoitza lortzen joaten den neurrian, bizilekua aldatu zuen ekitaldiaren autolikidazio osagarri bat aurkeztea, zehapenik, berandutze interesik eta inolako errekargurik gabe.

Erresuma Batua Europar Batasunetik erretiratu denez 2020ko otsailaren 1etik aurrerako ondorioekin, eta aldi iragankorra 2020ko abenduaren 31n amaitu denez, herrialde horretara tokialdaketak ez du aukera hori emango.

 

Negoziatzeko onartu gabeko baloreen tratamendua PFEZn

PFEZn negoziatutako baloretzat hartzen dira 2004/39/EE zuzentarauean ezarritako bigarren mailako balore merkatu ofizialetako batean negoziatzeko onartutakoak.

EBtik irtetearen ondorioz, 2004/39/EE zuzentaraua Erresuma Batuko sozietate kotizatuen baloreetan ez aplikatzeak ondorioak ditu PFEZn. Ondorio horiek orain laburtuko ditugu:

PFEZFAren 34 e). eta 41.2 a). artikuluek akzio edo partaidetzak jaulkitzeko primaren banaketaren, eta kapitalen murrizketaren tratamendua ezartzen dute, ekarpenak itzultzea dakartenean, 2004/39/EE zuzentarauan finkatutako Europar Batasuneko balore merkatuetako batean negoziatzeko onartutako baloreen eta negoziatzeko onartu gabeko baloreen artean.

Erresuma Batuan bizi diren sozietate kotizatuetako baloreei, EBtik irteten direnez, jaulkipen prima banatu eta kapitala murrizten den kasuetan, ekarpenak itzultzea dakartenean, kotizatu gabekoetarako ezartzen den tratamendua aplikatuko da.

PFEZFAren 43 g). artikuluak ezartzen du, aipatutako 2004/39/EE zuzentarauean finkatutako Europar Batasuneko balore merkatuetako batean negoziatzeko onartutako balore edo partaidetzak eskualdatzen badira, zergadunak balore homogeneoak eskuratu baditu eskualdaketa horien aurreko edo hurrengo bi hilabeteetan, zergadunaren ondarean jarraitzen duten balore edo partaidetzak eskualdatzen diren heinean integratuko da ondare galera.

Kotizatu gabeko baloreen eskualdaketaren kasuan, kontuan hartzen den epea ez da bi hilekoa izango da, baizik eta eskualdaketaren aurreko edo ondorengo urtebetekoa (43 h). artikulua).

Erresuma Batuan bizi diren sozietate kotizatuen baloreak badira, EBtik irtetean, balore horien eskualdaketak eragindako ondare galera integratzeko ezarritako epea bi hilekoa izatetik urtebetekoa izatera pasako da.

PFEZFAren 47.1. artikuluak berariazko balorazio arauak ezartzen ditu ondare aldaketa gertatzen den kasuetan, eta a) eta b) letretan balore kotizatuen eta kotizatu gabeko kostu bidezko eskualdaketetan aplikatzeko tratamendua ezartzen du.

Erresuma Batuan bizi diren sozietate kotizatuen baloreak badira, EBtik irtetean, balore horien kostu bidezko eskualdaketaren tratamendua kotizatu gabeko balore eskualdaketarako ezarritakoa izango da.

 

Sozietateen gaineko zergaren foru arauko VI. Tituluan, VII. Kapituluan ezarritako geroratze araubide berezia aplikatzea

PFEZFAren 47. artikuluko 3. atalak sozietateen gaineko zergari buruzko abenduaren 13ko 37/2013 Foru Arauan, VI. Tituluko VII. Kapituluan ezarritako zerga geroratzeko araubide berezia pertsona fisiko bazkideei aplikatzea ezartzen du, hau da, bat-egiteen, zatiketen, aktiboen ekarpenen, balore trukeen eta Europako sozietate baten edo Estatu kide bateko Europako sozietate kooperatibo batetik Europar Batasuneko beste Estatu kide baterako helbide sozialaren aldaketaren araubide berezia.

Erresuma Batua EBtik irteteak araubide hori ez aplikatzea ekar lezake, esku hartzen duten erakundeen, bazkideen edo elementuen mende bdagoelako, EBko estatu kide batean kokatuta dauden kontuan hartuz, edo zenbait kasutan, Europako Esparru Ekonomikoan (SZFAren 101. artikuluan eta hurrengoetan); zenbait kasutan, Erresuma Batuak EEEn jarraitzen badu salbu.

 

Nazioarteko zerga gardentasuna

PFEZFAren 51.12. artikuluak, nazioarteko zerga gardentasunari buruzkoak, artikulu horretan ezarritakoa, Espainiako lurraldean bizitzen ez den erakundea Europar Batasuneko beste estatu kide batean bizi bada ez dela aplikatuko ezartzen du, betiere zergadunak egiaztatzen badu baliozko arrazoi ekonomikoengatik eratu dela, eta jarduera ekonomikoak egiten dituela, edo Europar Batasuneko estatu kideren batean eratu eta helbideratutako inbertsio kolektiboko erakundea dela.

Erresuma Batua EBtik kanpo dagoen neurrian, salbuespen hori ez da aplikatuko.

 

Loteria, apustu eta zozketen sarien karga berezia

Erakunde publikoek edo EBko edo EEEko beste estatu kide batzuetan ezarritako erakundeek antolatutako loteria, apustu eta zozketen sarietan ezarritako % 20ko karga berezia, Estatuko Loteria eta Apustuen Estatu Sozietatearen, ONCE eta Gurutze Gorria erakundeen helburu berdinei jarraitzen badiete, ez zaie aplikatuko Erresuma Batuan bizi diren horien baliokideak diren erakundeek antolatutakoei. Horrela, sari horiek, PFEZen ordainduko dituzte zergak, ondare irabazi gisa, zergaren arau orokorren arabera (hau da, salbuespenik gabe, eta karga eskala orokorra aplikatuz), Erresuma Batuak EEEren barruan jarraitzen badu salbu.

 

Zerga hau 21/2014 Foru Arauak, ekainaren 18koak, ez-egoiliarren errentaren gaineko zergarenak arautzen du (EEEZFA).

Zergadun ez egoiliarrek, bai pertsona fisikoek, bai erakundeek, Arabako Lurralde Historikoan lortutako errenta zergapetzen du (EEEZFAren 1. artikulua).

Bi modutara zergapetzen dira (EEEZFAren 15. artikulua): a) Ezarpen iraunkorrik gabe lortutako errentak; b) ezarpen iraunkorraren bidez lortutako errentak.

Zerga horrek Europar Batasuneko beste Estatu kide batzuetako egoiliarrei aplikatzen zaizkien berariazko xedapenak jasotzen ditu. Xedapen horiek ez zaizkie aplikatuko Erresuma Batuan bizi diren zergadunei aldi iragankorra amaitutakoan.

Hala ere, nabarmendu behar da bi aldeko hitzarmena dagoela Erresuma Batuaren eta Espainiaren artean ezarpen bikoitza saihesteko. Hitzarmen hori aplikatzen jarraitu ahalko da.

 

Brexitek EEEZn dituen ondorioak, ezarpen iraunkorrik gabe lortutako errenten kasuan:

Erresuma Batuan bizi direnek lortutako errentei dagokienez, 2021eko urtarrilaren 1etik sortzen badira, Europar Batasuneko estatu kide batean zergadun egoiliar izateari uzteak ekarritako aldaketa hauek kontuan hartu beharko dira:

Salbuetsitako errentak (14. artikulua eta EEEZFAren zortzigarren xedapen gehigarria)

Salbuespen hauek ez dira aplikatuko:

• Europar Batasuneko beste estatu kide batean bizi direnek ondasun higigarriekin lortutako interesak eta ondare irabaziak, zenbait salbuespenekin.
• Espainian bizi diren sozietate filialek EBko edo EEEko beste estatu kide batean bizi diren sozietate nagusiei banatutako irabaziak, informazioa trukatuz, edo beste estatu kide batzuetan kokatuta dauden azken horien establezimendu iraunkorrei, betiere zenbait baldintza betetzen badituzte.
• Pentsio Plan eta Funtsen Legearen testu bateginean (1/2002 Legegintzako Hereje Dekretua, azaroaren 29koa) araututakoen baliokideak diren pentsio funtsek irabazietan lortutako dibidenduak eta partaidetzak, Europar Batasuneko edo EEEko beste estatu kide batean bizi badira, informazioa benetan trukatuz, edo beste estatu kide batean kokatuta dauden erakunde horien ezarpen iraunkorren bidez.
• Europako Parlamentuaren eta Kontseiluaren 2009/65/EE zuzentarauak araututako inbertsio kolektiboko erakundeek, edo EEEko estatuetan kokatuta dauden inbertsio kolektiboko erakundeek irabazietan lortutako dibidenduak eta partaidetzak.
• Bazkide diren sozietateen arteko kanonak, Europar Batasuneko estatu kide batean kokatuta dagoen sozietate bati, edo sozietate horren establezimendu iraunkor bati, EBko beste estatu kide batean kokatutakoari ordaindutakoak, betiere zenbait baldintza betetzen badira.
• Ohiko etxebizitzan berrinbertitzeagatiko salbuespena, EBko, Islandiako eta Norvegiako zergadunentzat: ezingo dira zergapetzetik salbuetsi Araban duten ohiko etxebizitzaren eskualdatzearekin lortutako ondare irabaziak, betiere eskualdaketarengatik lortutako zenbateko osoa beste ohiko etxebizitza baten erosketan berrinbertitzen bada.

 

Zerga oinarria (EEEZFAren 24.6. artikulua)

Ezingo dira kendu EEEZFAren 24.6. artikuluan ezarritako gastuak. Artikulu horren arabera, Europar Batasuneko beste estatu batean bizi diren zergadunek, pertsonek fisikoek, pertsona fisikoen errentaren gaineko zergari buruzko Legeak ezarritako gastuak kendu ditzakete, eta erakundeen kasuan, sozietateen gaineko zergari buruzko Legeak ezarritakoak, betiere Espainian lortutako etekinekin zuzenean lotuta daudela, eta Espainian egindako jarduerarekin zuzeneko eta bereizi ezina den lotuta badute.

 

Karga tasa (EEEZFAren 25. artikulua)

Karta tasa orokorrera zergapetutako errentei dagokienez, ez da aplikatuko % 19ko karga tasa orokorra, EBko egoiliarrei aplikatzen zaiena, eta % 24koa aplikatuko da.  Errenta horien artean aipa daitezke: higiezinen etekinak, laneko etekinak, ondasun higiezinei egotzitako errentak…

 

EBko egoiliarrek PFEZengatik tributatzeko duten aukera (EEEZFAren 40. artikulua)

Ez da aplikatuko EEEZFAren 40. artikuluaren araubidea. Araubide horren bidez, zergadun ez egoiliarrek, pertsona fisikoek, Europar Batasuneko beste estatu kide bateko edo Europako Esparru Ekonomikoaren estatu kide bateko egoiliarrak direla egiaztatzen badute, eta estatu kide horrekin zergei buruzko informazio truke badago, legez paradisu fiskal gisa kalifikatutako herrialde edo lurraldeetan bizi direnak izan ezik. Horiek guztiek zergak Arabako Lurralde Historikoan ordaintzea aukera ahalko dute, pertsona fisikoen errentaren gaineko zergaren zergatu gisa, baina horrek ez du ekarriko EEEZren zergadun izaera galtzea, betiere inguruabar hauek gertatzen badira:

• Ekitaldian Espainian lanaren eta jarduera ekonomikoen bidez lortutako etekinen batura guztira lortutako errenten ehuneko 75 izatea, gutxienez. Ondorio horietarako, errentak zenbateko garbiaren bidez kalifikatu eta zenbatuko dira, pertsona fisikoen errentaren gaineko zergari buruzko Legean ezarritakoaren arabera.
• Euskal Autonomia Erkidegoan lortutako errenta Espainian guztira lortutako errentaren zatirik handiena izatea. Ondorio horietarako, errentak zenbateko garbiaren bidez kalifikatu eta zenbatuko dira, pertsona fisikoen errentaren gaineko zergari buruzko Legean ezarritakoaren arabera.
• Arabako Lurralde Historikoan lortutako errenta beste bi lurralde historikoetako bakoitzean lortutakoa baino gehiago izatea. Ondorio horietarako, errentak zenbateko garbiaren bidez kalifikatu eta zenbatuko dira, pertsona fisikoen errentaren gaineko zergari buruzko azaroaren 27ko 33/2013 Foru Arauan ezarritakoaren arabera.

 

Brexitek EEEZn dituen ondorioak, ezarpen iraunkorraren bidez lortutako errenten kasuan: Ezarpen osagarria (EEEZFAren 19.2. eta 19.3 artikuluak)

Erakunde ez egoiliarren ezarpen iraunkorrei eskatu ahal zaie errentak atzerrira transferitzen badituzte. Ezarpen osagarria ez da aplikatuko bere egoitza fiskala Europar Batasuneko beste estatu kide batean duten erakundeek ezarpen iraunkorren bidez Arabako lurraldean lortutako errentak badira, paradisu fiskaltzat artzen den herrialde edo lurraldea bada, edo ezarpen bikoitza saihesteko Espainiarekin hitzarmen bat sinatu duen Estatu batean, bestelakorik berariaz ezartzen ez dela, betiere elkarrekiko tratamendua badago.

Erresuma Batuarekin hitzarmen bat dago ezarpen bikoitza saihesteko. Brexitek ez du eraginik, eta ez da jasotzen mota horretako ezarpen osagarririk, beraz, ezarpen osagarriak aplikatu gabe jarraituko du hitzarmenaren bidez.